Það var í fréttum á dögunum að stormsveipur eða skýstrokkur hafi valdið talsverðu tjóni í London. Þetta fyrirbæri er ekki algengt á þessum slóðum en er þó árlegt veðrabrygði einhverstaðar á Bretlandseyjum. Árið 1950 var skýstrokkur 2 mönnum að bana á suður Englandi. Þetta fyrirbæri er þó mun algengara á sléttum norður Ameríku og geta orðið gríðar öflugir og valdið skelfilegu tjóni.

Saga sem ég heyrði fyrir magt lögu segir frá skýstrokk, en að vísu ekki ýkja stór, sem kom á Eyrarbakka einhverntíman fyrir miðja síðustu öld. Það var þannig að þrír menn voru staddir í sjógarðshliði við Vesturbúðirnar þegar skýstrokkurinn kom austur með fjörunni og sogaði upp mikið af sandi og var kolsvartur ásýndum. Mennirnir í hliðinu höfðu aldrei séð því líkt áður og töldu sjálfan djöfulinn vera þar á ferð, tveir mannana ákváðu að forða sér í skindingu en þriðji maðurinn sagðist ekki óttast djöfulinn.

Þega skýstrokkurinn var kominn á móts við sjógarðshliðið breytti hann skindilega um stefnu og æddi upp um hliðið og tók þar með sér manninn sem þar stóð og lyfti honum upp frá jörðu. Maðurinn snerist þar í ótal hringi í lausu lofti  þá ca. 50 metra sem skýstrokkurinn dró hann áður en fyrirbærið sleppti af honum taki. Maðurinn sem í þessu lenti varð aldrei samur eftir og átti aldrei síðan eftir að mæla nokkurt orð af vörum eftir þessa reynslu.