Brim á Bakkanum

brimið þvær hin skreypu sker

Tilkynningar

Brimið á Bakkanum er líka á feacebook

Valið efni af þessari síðu er einig að finna á http://eyrarbakkinews.blogspot.is/  
eða notið google leitarvél til að finna heimildir af síðunni- Dæmi: Brim á Bakkanum Jón Jónsson,
       

Færslur: 2011 Janúar

31.01.2011 23:11

Mildur janúar

Hitafar í janúar 2011Þurrviðri var framanaf og nokkuð frost mældist fyrri hluta mánaðarins, mest -10,7°C þann 6. Síðari hlutinn var mildur, en ekkert frost mældist eftir 19. Fór hitinn hæst í 8°C þann 21. Síðari hlutinn var einnig nokkuð vætusamur. Allhvasst var af norðri þann 3-4. og stormur á þrettándanum (7.) með talsverðum vindhviðum, en yfirleitt gola eða blástur og stöku sinnum kaldi. Brim hefur verið alla daga frá 19. Engan snjó festi í mánuðinum.

31.01.2011 01:24

Draugaskipið "Rósa"

Oft í sögunni hafa sjómenn svarið þess dýran eið upp á æru og trú að hafa séð draugaskip siglandi fyrir fullum seglum einhverstaðar á víðáttum heimshafana og oft hafa spunnist ótrúlegar sögur af þessum mannlausu farkostum sem væru dæmd til að sigla um regin höf til eilífðar nóns. Það var því engu líkara en eitt slíkt draugaskip hefði verið sært upp af illum öndum síðla dags þann 6. mars 1847, því þennan dag sáu menn úr Þorlákshöfn dularfullt skip í hafi, reiðalaust og á reki 4-5 mílur undan landi.

Það var brim og stormur á Bakkanum og úti fyrir Þorlákshöfn þennan dag og því ekki hægt að kanna þetta ókunna skip nánar og brátt hvarf það út í myrkrið og sortann. Daginn eftir (7. mars) sást skipið enn á ný á þeim sama stað og fyrri daginn, en nú var sjóveður betra og lögðu 4 teinæringar út frá Þorlákshöfn og tókst þeim að komast að skipinu og kanna það nánar. Skipið sem hét "Rose" reindist vera mannlaust og augljóslega yfirgefið, því skipsbátinn vantaði. Farmur þess var eðal timbur, líklega mahony frá Ameríku, en engin skipskjöl fundust önnur en hafnarkort af Liverpool, en þangað átti skipið trúlega að fara. Tóku þeir nokkuð lauslegt og settu í báta sína.

Nú vildu menn draga skipið að landi, enda mikil verðmæti, fólgin í skipi og farmi. En það var sama hvað á árarnar reyndi, skipið dró þá í þveröfuga átt, vestur með landi og út á haf svo senn mundi mönnum landsýn hverfa. Urðu þeir nú að sleppa skipinu svo heim næðist fyrir myrkur og réru þeir að því búnu nokkuð vonsviknir til Þorlákshafnar. Það var svo tveim dögum síðar, (9.mars) eins og fyrir hendi hinna ófyrirleitu anda þessa draugalega skips, að borið hafði á sama stað og þegar til þess sást fyrst. Réru nú öll róðraskip sem á flot varð komið frá Elliðahöfn 16 að tölu undir stjórn Eyjólfs Björnssonar hreppstjóra í Þorlákshöfn út að draugaskipinu og festu í það taugar og tóku menn á árum hvað þeir gátu á öllum 16 skipunum. Með miklu erfiði og útsjónarsemi tókst þeim smátt og smátt að þoka draugaskipinu nær og nær landi, þar til að lokum náðu skipinu til hafnar og festu þar tryggilega.

Þá var tekið til ráðs að sækja sýslumann, sem svo kvað upp úr með það að best væri að rífa þetta andskotans skip, og bera viði þess og farm á land. Yfir þetta verk setti hann bræðurna Magnús á Hrauni, Árna á Ármóti og Halldór Guðmundsson á Torfastöðum og gekk það verk furðu vel og áfallalaust. Seldi svo sýslumaður allt góssið á uppboði, og rann helmingur til Kóngsins í Kaupmannahöfn, sem einhverjum þætti mikill skattur í dag og helmingur í björgunarlaun að frádregnum kosnaði, en góssið seldist á 2.883 ríkisdali og skipsviðir og járn á 698 rd.

Byggt á heimildum: Saga Eyrarbakka, Vigfús Guðmundsson.

30.01.2011 01:23

Bakkaskipin á 20. öld

Gufuskipið "Nordlysed"  (á vegum "Gestsfélagsins" KF Heklu) "Modest" (stórt gufuskip). "Elegance" (til " Gestsfélagsinns"). "Svend" (skip Lefolii, en það rak upp í landsteina við Þorlákshöfn 1911). "Thor" (skip Lefolii, en það fórst árið 1900 ). "Soldes" (Stokkseyrarskip) "Christian" (Stokkseyrarskip frá Mastal, strandaði við Vestmannaeyjar 1904) "Guðrún" (vöruskip Ólafs kaupmanns á Stokkseyri, strandaði þar 13. sept. 1906). "Herta" 200 tn. (Hún var frá Marstal,en á vegum Kaupfélags Árnsinga og sleit upp með timurfarm 1937) "Kong Helge" "Perwie"  "Vonin" "Hólar" og "Henry" (Komu reglulega). Síðasta skonnortan sigldi héðan árið 1931. Síðustu tvö gufuskipin sigldu frá Bakkanum 1939 og einnig þau 4 vélskip sem hingað komu með vörur erlendis frá. Þá hafði heimstyrjöldin skollið á og Eimskipafélag Íslands því eitt um að flytja vörur til og frá landinu, auk þess sem millilandaverslunin á Suðurlandi var þá liðin undir lok eftir rúmlega 600 ára verslunarsögu og 1000 ára siglingasögu hafskipa.

27.01.2011 02:04

Bakkaskipin á 18 og 19 öld.

Skonnorturnar á 18. öld  

María skip Jens Jörgensen, Söndeborg, Gertrud Kathine, Forellen, skipstjóri Lars Boijesen og kom skipið árlega frá 1788. (Forellen fórst við Vestmannaeyjar 1794, en mannbjörg varð). Rypen, (mjög lítið skip). Húkkortan Vestmannaöen, (Fórst á Eyrarbakka 1794, en skipið hafði komið hvert ár frá 1788). Unge Jakop (frá Björgvin) Prins Vilhelm, skipstjóri: Boije Stephansen (Strandaði á Eyrarbakka 1. okt 1725)

Frau Cecilia, (Slitnaði af festum 22. júní 1759 vegna hafís) Dorethea Richel, skipstjóri: Simon Knudsen (Slitnaði upp og strandaði 1764) Jómfrú Anna, (Var í timburflutningum og slitnaði upp af festum 1770) Póstjaktin Sílden, (Var ekki Bakkaskip en átti erindi og strandaði á Hafnarskeiði 1781) Kúfskipið Emannuel, skipstjóri: Jensen. (Fórst í höfninni 1785) Jægerborg, Skipið átti Agent Budenhoff, en skipstjóri var Buch. Niels Lambertsen var stýrimaður, en hann var síðar alræmdur verslunarstjóri á Eyrarbakka. ( Skipið sleit upp í óveðri 1786 og sópaðist þá burt festarklettur sem hét "Hermannsgatið" en kletturinn hafði verið festarhald frá ómuna tíð). Briggskipið Anna et Christense, (Sleit upp í brimi 1798).

Skonnorturnar á 19. öld hétu þessum nöfnum: Bedre Tider , Resolution, skipstjóri: Niels Bierun. Hóf siglingar 1795. (Sleit upp og strandaði á Hafnarskeiði 30. mai 1813. Var þá nýlega komið frá Kristiansandi í Noregi). Bosand, Carlotta Sophie, skipið átti Niels Lambertsen. Julíus, skipstjóri: Jeff Nielsen. Ceres, skipstjóri: Jeff Nielsen. Bryggskipið Anna, skipstjóri: Niels Mogensen. (Strandaði á höfninni 10.júní 1826). Robert, Prima, Ulrika, (21,5 tn) Fortuna, (61 tn) De 18 Söskende,(1817) Skonnortan Velunas, Skipstjóri: E. Paulsen. (Strandaði í höfninni 9. júlí 1846) Waldimar 70 lestir að stærð. (strandaði á skeri utan við höfnina í innsiglingunni á Eyrarbakka 14. september 1855) Absalon, (fórst á höfninni 15.maí 1859). Skonnortan Olaf Rye (var í eigu Eyrarbakka verslunar og var hið vandaðast og besta skip. Það sleit upp í Njarðvík í oktober 1859) Sophie af Odense, skipherra: L. Sörensen. (Strandaði á Eyrarbakka 2.okt.1861) Jagtskipið "Ingólfur" frá Eyrarbakka (strandaði með fullfermi af salti á Slignafjöru í Meðallandi 1.apr.1862). Emma María, (sleit upp í stórviðri að morgni 21. sept. 1870) A Thorkelsens Minde. (Strandar á Eyrarbakka 1875, en ekkert meira vitað um skipið.) Marie, á vegum Einars Borgara. Aktiv, norskt skip á vegum Einars borgara. (Skipið brotnaði á Eyrarbakka 12. september 1883) Elbö.(Strandar á Eyrarbakka 3.maí 1879 hlaðið kornvörum, en ekki meira vitað um skipið). Bakkaskipið Anne Lovise, skipstjóri: Christensen (Strandaði á Hafnarskeiði á leið til Þorlákshafnar með salt 22.september 1883 og féll kafteinn Christensen útbyrðis og drukknaði) Johanne Marie, á vegum Guðmundar Ísleifssonar. (Strandaði á Eyrarbakka 1.júní 1892) Kepler, á vegum Jóns í Höfninni og Einars borgara. (Strandaði í Skötubót 3. maí 1895) María Kr. Johan, Carlotte, Zephyr (3 mastra) kom á Stokkseyri 1880 fyrst en síðan oft á Bakkann. Fyrsta gufuskipið á Bakkann var "J.C. Coghill" 1890. Fyrsta gufuknúna skipið sem kemur á Stokkseyri var Sænska skonortan "Toncea" 1891. Flestar skonnorturnar voru fremur lítil skip (Tveggja mastra). Undir lok aldarinnar voru eftirfarandi skip helst: Thor, Terpsicora, Kristíne, Nils, Elbo, og Frederica.

Skip nokkur á 14. öld.

 "Lýsubússan" (sleit upp 1343 og brotnaði í spón) "Margrétarsúðin" (brotnaði á Eyrum 1346 -"Bessalanginn" strandaði á Síðu árið eftir) "Þorlákssúðin" (fórst í hafi1382, en áhöfnin komst á báti til Grænlands) "Svalaskipið" (fórst fyrir sunnan land, skipshöfn Andrésar kolls, hraktist á bátum dögum saman og margir dóu af hungri og vosbúð, en 13 var bjargað frá Dyrhólaey).

 þetta er þó ekki tæmandi listi. Heimild: Saga Eyrarbakka

23.01.2011 23:41

Ránka mjóva

Háeyri í tíð Guðmundar ÍsleifssonarRannveig Jónsdóttir mjóva (um 1584-1654) sat á Háeyri árin 1635-1654. Hún var yngsta dóttir Jóns sýslumanns Björnssonar prófasts á Melstað og Guðrúnar Árnadóttur sýslumanns á Hlíðarenda. Ránka var aldrei við karlmann kend en stundaði útgerð af Eyrarbakka og Þorlákshöfn. Hún var nafntoguð fyrir örlæti í garð fátækra og þurfandi. Ráðsmaður hjá henni var lengi frændi hennar Sigurður Bjarnason frá Stokkseyri, föðurbróðir galdrakvendisinns Stokkseyrar-Disu. Skip eitt lét Rannveig smíða á efri árum sínum, áttæring er fórst spónnýr í jómfrúarferð sinni frá Eyrarbakka 2. febrúar 1653 með allri áhöfn 9 mönnum og urðu þá 20 börn á hennar heimili föðurlaus.

Um Þorrakomu ári síðar rak mikinn karfa austur með  Eyrarbakka og Hafnarskeiði, og var fiskurinn seldur upp um sveitir, hundraðið á 5 álnir og var stórt gagn þeim sveitum. Á Háeyri á Eyrarbakka báru tveir menn á lítilli stundu úr flæðarmáli og upp á land 16 hundruð karfa og höfðu helming þar af fyrir ómakið. Á Háeyri var þriggja stafgólfa grindahús kjaftfullt af fiski milli gafls og gáttar og öllu útbýtt til þurfandi og fátækra næstu tvær vikur, en það voru margir sem þurftu með. Þetta var seinasta góðverk Rannveigar, því að hún andaðist aðfaranótt 23. febrúar þá um veturinn. Hún hafði alltaf haft bænhús á Háeyri fyrir sig og heimafólk sitt, en hún var jörðuð í Stokkseyrarkirkjugarði að norðanverðu.

Heimild: V.G. Saga Eyrarbakka- Lesb.mbl.5.tbl.1955

  • Meira um fiskreka á Eyrarbakka.
  • 22.01.2011 23:23

    Sandhöfn

    Höfnin á Eyrarbakka
    Þetta er ekki Landeyjarhöfn (Sem sumir kalla "Sandeyjahöfn") heldur höfnin á Eyrarbakka, en þar er vart lengur von á skipakomu. Höfnin var aflögð snemma á 9. áratugnum og er nú óðum að fyllast af sandi. Sandburður hefur ætíð verið mikill með suðurströndinni og var það tal gamalla manna að ef byggja ætti sandlausa höfn á Suðurlandi, þá yrði hún að byggjast úti á sjó með brú í land.

    21.01.2011 00:15

    Kirkjan fyrir 120 árum

     Eyrarbakkakirkja skömmu fyrir aldamótin 1900
    Eyrarbakkakirkja 1890Kirkjan á Eyrarbakka var byggð 1890 og eru þessar myndir frá þeim tíma. Hún var því 120 ára í desember sl. Járnblómið komið á turnspýrunna. Í bakgrunni er Vesturbúðin og barnaskólinn, bakaríið og nokkur bæjarhús, (líklega hjáleigur frá Skúmstöðum) Búðarstígur óbyggður enn. Neðri myndin sýnir lestarhesta með heyfeng ofan af engjum við kirkjuna sem er með vinnupall umhverfis turninn í byggingu.

  • Vesturbúðirnar Kirkjan Endurbætur á kirkjunni
  • Heimild: Saga Eyrarbakka.
  • 19.01.2011 00:04

    Elín í Akbraut

    Akbraut-Smellið á myndina til að sækja nýja mynd frá Eyrarbakki.isNærri því hvert hús á Eyrarbakka á sína sögu. Sum hús fá ef til vill meiri athygli en önnur vegna þess að þar hafði einhvern tíman búið frægt eða auðugt fólk. Önnur hús eiga kanski ekki síður merkilega sögu vegna þess að tilvist þeirra ber þeirri lífsbáráttu vitni sem háð var, oft að litlum efnum og erfiðleikum. Mörg litlu snotru húsin á Bakkanum eiga á margan hátt sammerka sögu í átakanlegri lífsbaráttu alþýðufólks um aldamótin 1900.

    Elín PálsdóttirUm og eftir 1870 voru vesturferðir (til Kanada) mjög í tísku og einn af þeim mörgu sem brá búi sínu í þeim tilgangi var Páll Andrésson í Gróf í Hrunamannahreppi Magnússonar frá Syðra-Langholti og kona hans Geirlaug Einarsdóttir Jónssonar frá Húsatóftum á Skeiðum. Það var árið 1872 sem þau héldu til niður á Eyrar, en þar sem Geirlaug var með barni, hugnaðist henni ekki að halda út á hafið mikla þegar tíminn kom að ýtt skildi úr vör. Þau settust því að á Grjótalæk austan Stokkseyrar. Þar fæddist Andrea Elín Pálsdóttir (1872-1950 ) og fluttu þau þá í Nýjabæ á Eyrarbakka næsta vor, þar sem Páll stundaði sjósókn á egin skipi og búskap jöfnum höndum. Páll fórst með skipi sínu við annan mann á Einarshafnarsundi 1894, en aðrir björguðust, þar á meðal Björgúlfur Ólafsson, er þá var trúlofaður Elínu. Þau settust að í Litlu-Háeyrarhverfi 1897. Eftir stutta sambúð missti hún Björgúlf frá kornungu barni (Pálína) og öðru ófæddu (Björg) og stóð hún ein og vann fyrir sér og börnum með saumaskap og handavinnu þar til árið 1907 að hún giftist Þorbirni Hjartarsyni (1879-1956) frá Auðsholtshjáleigu í Ölfusi og eignuðust þau fjögur börn. Þar sem fyrir var lítill torfbær breytti Þorbjörn í snoturt timburhús og nefndi Akbraut og stendur það enn og er friðað. Eftir þeirra dag bjó Geirlaug  dóttir þeirra, (1914-2007) nær alla sína æfi í Akbraut.

    Heimild: Tíminn 34.tbl. 1950-Morgunbl.31.tbl.1950. www.minjasafnreykjavikur.is www.mbl.is/mm/gagnasafn eyrarbakki.is

    Sögur margra merkra húsa á Bakkanum má finna á eyrarbakki.is

    http://www.eyrarbakki.is/um-eyrarbakka/husin-a-bakkanum

    18.01.2011 00:31

    Hjónabandsglettur

    Einhverju sinni um aldamótin 1700 bar það til tíðinda á Eyrarbakka að kerling ein áttræð giftist tvítugum manni. Eftir að parið hafði eitt hveitibrauðsdögum sínum og reynt alvöru lífsinns í eitt ár, ákvað kerling að skila piltinum og sagði að hann væri ónýtur.

      (Grímsstaða annáll 1706)

    Haustið 1890 var nýr sýslumaður settur í Árnessýslu. Fyrsta málið sem hann tók til meðferðar var hjónaskilnaðarmál. Komu þau hjónin fyrsta morgun hans á Eyrarbakka, og áður en hann var kominn á fætur. Þau hjónin voru mjög ástúðleg hvort við annað, eins og nýtrúlofað par, og ávörpuðu hvort annað með elskan mín og ástin mín. Þegar sýslumaður ætlaði að reyna að tala um fyrir þeim, að slíta ekki sambúðinni, var ekki nærri því komandi. Þau voru búin að undirbúa alt, hvernig þau skyldu skifta börnunum og efnunum. Um það var hið besta samkomulag. Allar tilraunir sýslumannsinns til þess að fá þessi ástúðlegu hjón til að hætta við hjónabandsslit, voru árangurslausar með öllu. Þá hafði presturinn verið fenginn til að gera sátt, en það fór allt á sömu lund og fengu þau að endingu sinn langþráða hjónaskilnað.emoticon

     (Sigurður Briem: Minningar).

  • Spaug
  • 15.01.2011 23:59

    Veðurmetin 2010

    Frá veðurathugunarstöðinni á Eyrarbakka:
    Mesti hiti á árinu 2010 var 22°C þann 18.júlí sem jafnframt var heitasti dagur ársinns. (meðalhiti 17,2°) en lægsti hiti var -16.8 °C þann 22. desember sem var kaldasti dagur ársinns (meðalhiti -12.5). Mesta sólarhringsúrkoma á árinu mældist 34 mm 26. desember samkvæmt tölum frá VÍ.
     Stormviðri voru fátíð og veðurlag allt hið besta, ef undan er skilið öskufok sem talsvert bar á fram á sumarmánuði.Mesta frost -16,8°CMesti hiti 22°C34mm úrkoma á sólarhring

    15.01.2011 01:00

    Bakkinn fyrir 60 árum

    Árið 1950 hafði fullur helmingur heimila á Eyrarbakka kýr, eina eða fleiri. Víða hænur, hestar eða kindur og hvert heimili hafði einhverjar landnytjar, eða í það minnsta kálgarð. Þá voru fjórir vélbátar, 12-18 lestir að stærð gerðir út, og hraðfrystihúsið sem þótti allstórt var í fullum rekstri yfir vertíðirnar, en það tók einnig til geymslu kjöt af fé því, sem þar var slátrað á haustin, ásamt verkuðu kjötmeti heimamanna, t.d. slátri.

    Trésmíðaverkstæði og bifreiðaverkstæði var þá einnig starfandi á Bakkanum og a.m.k þrjár verslanir, bakarí og pósthús og fangelsið sem er enn á sínum stað. Um 40-50 ha. lands var nýtt undir kartöflur og gulrætur hjá Eyrbekkingum, þar af 10 ha í svokallaðri "Sandgræðslu" og keyptu kartöflubændur í félagi stórvirkar vélar til nota við kartöfluræktina. Þá var íbúafjöldi um 600, eða nokkuð sá sami og nú 60 árum síðar, en atvinnutækifærin á Bakkanum eru hinsvegar miklu mun færri í dag en þá, sem er í sjálfu sér afar dapurlegt eftir allan þennan tíma í þróun atvinnumála í landinu.

    Heimild: m.a. Tíminn 185.tbl 1950

    12.01.2011 22:22

    Hraungerðismæðgur

    Pálína PálsdóttirPálína Pálssdóttir í Hraungerði var fædd 9. maí 1891 að Háakoti í Fljótshlíð, en hún ól allan sinn aldur á Eyrarbakka. Faðir Pálínu, Páll Guðmundsson frá Strönd í Meðallandssveit, vertíðarmaður á Eyrarbakka dó af lungnabólgu áður en hún fæddist og ólst hún upp hjá móður sinni Þorgerði Halldórsdóttir frá Rauðnefsstöðum í Rangárvallasýslu og ömmu sinni sem þá var ekkja. Þær mæðgur, Ingveldur móðir Þorgerðar og Pálína fluttu sig til Eyrarbakka og voru þær jafnan kallaðar Hraungerðismæðgur. Pálína vann í mörg ár í "Húsinu" á Eyrarbakka, en það þótti góður skóli fyrir ungar stúlkur að ráðast þangað. Þær mæðgur Þorgerður og Pálína sáu um kirkjuna í mörg ár, og var þar ekki kastað til höndum. Pálína giftist árið 1913 ekkjumanni, Guðmundi Ebenesersyni skósmið, en ekki varð þeim barna auðið. Pálina var mikilHraungerði/mynd -eyrarbakki.is söng og félagsmálakona. Hún gaf sig einnig að pólitík og var á hægri væng litrófsinns. Guðlaugur Pálsson kaupmaður ólst upp hjá þeim mæðgum í Hraungerði, en hann var sonarsonur Ingveldar.


    Eitt sumar, er þær mæðgur voru í kaupavinnu, Þorgerður með dóttur sína á einum stað, en amman á öðrum, brann litla húsið sem þær leigðu á Bakkanum. Þar misstu þær hvert tangur og tetur, sem þær áttu, utan ígangsklæða í kaupavinnunni. Allt var þá ein öskuhrúga þegar þær komu aftur heim. Þar brunnu þrír skautbúningar með silfurbeltum, koffrum og dýrri handavinnu, arfur frá ríkari formæðrum. Enginn maður gaf þeim neitt, engin samskot voru höfð af efnaðra fólki eins og annars var venja á Bakkanum, þegar heldra fólk átti í hlut. Ef til vill varð sá atburður til að móta Pálinu sem öfluga félagsmálakonu, bæði á andlegum sem og pólitískum vettvangi.


    Heimild: Morgunblaðið , 218. tbl.1983 - http://brim.123.is/blog/record/433319/ - www.eyrarbakki.is

    11.01.2011 23:26

    Þurkatíð

    0 mmFyrstu 11 dagar þessa árs hafa verið al þurrir og allar líkur á að þeir verði þó ekki fleiri en 12, að sinni, því spáð er dálítilli úrkomu á fimmtudaginn. Ekki hafa komið svo margir þurrir dagar í röð í janúarmánuði á Eyrarbakka síðan 1998. En lengsta samfellda þurkatíð í janúar var 13 dagar 1980 og 13 dagar 1959 og er þá talið frá árinu 1957. Norðlægar áttir hafa verið ríkjandi það sem af er mánuðinum.

    09.01.2011 21:40

    Heyrnleysingjaskólinn

    Stóra hraun var jafnað við jörðu 1937Á Stóra-Hrauni á Eyrarbakka var heyrnleysingjaskóli 1893-1908. Það bar þannig til að á alþingi 1891 bar Magnús landshöfðingi Stephensen fram tillögu um, að landssjóður legði fram 1000 kr. til þess að styrkja mann til að læra málleysingjakennslu. Var það samþykkt í einu hljóði, og fór séra Ólafur Helgason í Gaulverjabæ samsumars til Danmerkur í því skyni. Séra Ólafur var ungur maður, fæddur 25. ágúst 1867, sonur Helga lektors Hálfdanarsonar og Þórhildar Tómasdóttur prófasts á Breiðabólsstað, Sæmundssonar. Skóli séra Ólafs hófst 1. október 1892. Hann var fyrst í Gaulverjabæ, en síðan að Stóra-Hrauni, þar sem hann byggði sér reisulegt hús 1893. Í skólanum voru 9-12 börn, enda var þar ekki rúm fyrir fleiri. Námstíminn var 6 ár. Séra Ólafur starfrækti skólann í 12. ár. Þá andaðist hann á leið til Kaupmannahafnar 19. febrúar 1904. Ekkja séra Ólafs, Kristín Ísleifsdóttir prests í Gísli Skúlason prófasturKrístín ÍsleifsdóttirArnarbæli, Gíslasonar, hélt skólanum áfram næsta ár. En haustið 1905 tók séra Gísli Skúlason við stjórn skólans. Hann var fæddur 10. júní 1877, sonur Skúla prófasts á Breiðabólstað, Gíslasonar, og Guðrúnar Þorsteinsdóttur prests í Reykholti, Helgasonar. Málleysingjakennslu hafði hann numið í Kaupmannahöfn veturinn áður. Hann hafði skólann 3 ár, þangað til haustið 1908, en þá var skólinn fluttur til Reykjavíkur og gerður ríkisskóli.

    sr. Gísli gekk að eiga Kristínu ekkju fyrirrennara síns 15. apríl 1909, og var allan sinn aldur prestur að Stóra-Hrauni. Hann andaðist 19. ágúst 1942. Ekki var málleysingjunum kennd önnur handiðn á Stóra-Hrauni en prjón, enda slæm aðstaða til annara hluta. Var þá um það rætt að flytja skólann til Eyrarbakka, þar sem betri væri aðstaðan að þessu leyti. Af því varð þó ekki, heldur var hann fluttur til Reykjavíkur haustið 1908, eins og fyrr var sagt.



    Svo kvað Magnús Teitsson um sr. Ólaf:

    Miðlar Guði af málunum,

    með því þjóðin launi.

    Sorgarinn fyrir sálunum

    situr á Stóra-Hrauni.

    (Stórbýlið og prestsetrið Stóra- Hraun var rifið og jafnað við jörðu árð 1937)

    Heimild Menntamál 1945. Lesbók Morgunbl. 16.tbl.1985

    07.01.2011 23:47

    Hassviðrið

    21 m/sþrettándinn fór víðast hvar út um þúfur enda bálhvasst um allt land og í morgun var kominn á norðan stormur. Hvassast var á Bakkanum um kl. 9 í morgun 21 m/s, en stakar stormhviður gengu á alla nóttina allt að 25- 29 m/s. Annarstaðar á landinu var yfirleitt hvassara, en mesti vindur mældist á Bláfeldi 38.6 m/s. Mikil vindkæling var í gærkvöldi enda talsvert frost. Þannig jafnaðist vindkælingin á við 30 stiga frost um tíma.

    Flettingar í dag: 50
    Gestir í dag: 12
    Flettingar í gær: 0
    Gestir í gær: 0
    Samtals flettingar: 2088660
    Samtals gestir: 227703
    Tölur uppfærðar: 19.8.2017 14:42:49

    Veðrið á Bakkanum í dag

    Brimið á Bakkanum

    Farsími:

    8621944

    Staðsetning:

    Eyrarbakki

    Veðurhnöttur IR

    IR veðurhnöttur/smellið til að stækka

    Dagur og Nótt

    Click for Eyrarbakki, Iceland Forecast

    Eyrarbakkavegur: Umferð


    <60 60-70 70-80 80-100 100-110 110-120 >120

    km/hour-km/klst

    Öldufar

    Öldukort fyrir N Atlantshaf

    Ís og snjór

    Ís og Snjór frá NOOA

    Vefmyndavélar

    http://www.vegagerdin.is/
     

    Ráðhús-Árborgar við Austurveg

    Sjávarföll Eyrarbakka - Árborg

    Smellið á myndina til að 

    fá sjávarhæð í rauntíma.

    Stormglugginn

    Meteoalarm click here


    Meteoalarm.

    Eldra efni

    Tenglar

    Web Stats Counter

    Free counter and stats for your website on www.motigo.com